مش كل ما داعية يتجوز ولا يطلق تقعد تزيط .. اتقل كده

مش كل ما داعية يتجوز ولا يطلق تقعد تزيط .. اتقل كده
انت اتعودت تسمع اعلانات تجارية شعارها مصلحتك اولا ويهمنا خدمتك ورضاك
ومع ذلك مش بتنصدم لما تعرف ان الشركة بتكسب ارباح مهولة وانها طلعت بتكدب عليك وبتسعى لمصلحتها اولا واخيرا
حتى في الدول الحقيقة والمجتمعات اللي فيها حماية مستهلك مش بيعاقبوا الاعلانات دي باعتبار ان وعي المستهلك مفترض ان يكون محصن من الشعارات والا يبقى المستهلك اهبل .. هما بس يعاقبوا المعلن لو اعطى بيانات غلط عن فيتامينات مش موجودة او مواصفات محددة مخالفة للواقع
لكن غير كده لازم يكون المستهلك واعي ومش اول ما يلاقي يافطة محل مكتوب عليها عباد الرحمن يتخيل انه هايدخل يلاقي الذين يمشون على الارض هونا او الذين يبيتون لربهم سجدا وقياما اولو قلت لهم معييش فلوس يقوموا يعبوا لك عربية التسوق وصاحب المحل يوصلك لغاية باب البيت وهو شايل البضاعة على كتفه ويقولك لا عليك اخي فقد اهديت لي اليوم عملا صالحا عسى ان ادخل به الجنة ثم يبكي حتى تخضل لحيته
اتقل يا با وخلي وعيك يبقى فوق الصدمات الصغيرة دي
احنا عندنا صدمات كبيرة جاية في السكة وعايزة رجالة وستات ياكلوا الزلط

تعليقات

التسميات

عرض المزيد