السيستم واقع

طبق محفوظ في النيش ينال الاحترام والتقدير وبتزعق لاي حد يقرب منه لانك عارف ومتاكد انه لو طلع من النيش غالبا هاينكسر ومش هايستحمل الاستخدام العادي وطبق بتاكل فيه يوميا وبتاكل منه الاطفال لان عندك احساس انه لو خبط في الارض هايرد تاني ولو حصلت معجزة وانكسر تقدر بسهولة تجيب غيره انت هنا بتقدس طبق النيش لانك واثق في هشاشته وبتستخدم طبق المطبخ لانك واثق في عمليته لما بتثق حقيقة في شئ بتستخدمه ومش بتخاف عليه من البهدلة لانك متاكد من جواك انه عملي جدا ولما تفقد ثقتك في شيء بتبعده عن اي احتمال للاختبار العملي عارف امتى مشاكلك هاتقل النص؟! لما تقدر اللي بتستخدمه وتستغنى عن اللي مالهوش عازة او تقلل منه وانت عارف ان استخدامه الوحيد هو الاستخدام المتحفي وده في كل الاحوال استخدام ترفي افتح النيش اللي جواك افتحه ماتكسرهوش

هما رافضين الديموقراطية رغم ان الاغلبية معاهم ورافضة الديموقراطية زيهم وفي كل تجربة كانوا بيستخدموا الخيار الديموقراطي لرفض الديموقراطية بما ان الاغلبية معاهم قلبا وقالبا وحتى خصومهم الشرسين شركاء لهم في رفض الديموقراطية الا انهم لا يريدون الالتجاء للاغلبية وتحكيمها التي يعلمون سلفا انها في صالحهم لماذا؟ استسهال لسه هانقنع بقى وننجح باغلبية الثلثين ونضطر نتحالف مع اللي يسوى واللي مايسواش ونراضي ده ونضطر نضحك في وش ده وندادي الاعلامي ده والمقاول ده وسمسار الاصوات دوكه لاء احنا ناخدها من قصيرها ونستخدم رفض الشعب للديموقراطية في حرمانه منها ونشاركه في التمثيلية البايخة اننا قال يعني عندنا ديموقراطية احلى من ديموقراطية الجيران بتشف وترف على حبل الغسيل ولا ديموقراطية مدام نظيفة في عزها الغريب ان رغم عداء الغالبية لفكرة الديموقراطية الا انهم لا يجرؤون على اعلان ذلك العداء الا نادرا .. ليه ؟؟ عشان بيتكسفوا  يعني الجيران يبقى عندهم نيش وسفرة وصالون وديموقراطية واحنا معندناش !!!!! لاء ودي تيجي !!!!!!!!! السيستم واقع

العقل زينة زي النيش كده لكن للمطبخ ادوات اخرى "العلمانية المصرية هي فصل العقل عن الحياه العملية"

اظن ان الكائنات اليوسف زيدانية لها دور في التوازن البيئي احنا عندنا شوية موروثات كده اتحولت لبديهيات من كتر الترديد و مش متخيلين انها تحتمل مجرد التفكير فيها او مراجعتها و تحولت الى قضية نيش منزلي يعتبر المساس به خطرا على امن الاسرة  بيجي واحد شريك مخالف زي الكائن اليوسف زيداني يفتح النيش بغرض الشهرة و الظ هور بمظهر الجرئ فيبدأ حماة النيش في الصراخ و العويل و المطالبة باعدام هذا الكائن الذي سولت له نفسه انه يفتح النيش و يدعبس فيه  فيبدأ بعض العقلاء بطرح التساؤل عن سر قدسية النيش و نكتشف تدريجيا ان النيش زيه زي اي صندوق او دولاب ممكن ينفتح و يتشاف فيه ايه و مع الوقت ممكن نستخدم اطباقه مثلا في الاكل و الاستخدام و تبدا الحياه تمشي فلولا الكائن اليوسف زيداني مكناش فتحنا النيش و اكتشفنا الكنوز المستخبية اللي جواه

يولد الطفل على الفطرة باحثا متسائلا مكتشفا لاعبا مبدعا لكن ابواه يضبطانه وفق امكانياتهما و حدودهما المادية و العقلية و المجتمعية حتى لا يسأل اكثر من قدرتهما على الاجابة و لا يكتشف اكثر من قدرتهما على حمايته او قدرتهما على اصلاح ما خربه و يظل الطفل يحوم حول النار و الكهرباء و النيش و مع الزمن يفهم خطورة و اهمية و استخدام النار و الكهرباء و لكنه يبلغ و يكبر و يموت دون ان يفهم سر النيش و لكنه يظل حريصا حتى لحظاته الاخيرة على ان يقابل الله و ما فرط في نيشه ابدا

نقطة الوعي الاضافية لمظاهرات الثانوية العامة انهم رغم جرأتهم على الوزير و الرئيس و الحكومة و الدولة الا انهم ركزوا اكثر على المنظومة فاشلة الشباب واعون انهم مضارون و ان كل الحلول على حسابهم يعني اعادة الامتحانات كاملة ضرر لهم استكمالها بهذا الخراب ضرر محقق ادخالهم ما يريدون من كليات بدون تنسيق مستحيل الغاء التنسيق هذا العام كارثة محققة لانه نقطة ارتكاز النظام التعليم المصري الفاشل كاملا و اقالة الوزير لن تحل المشكلة و لن تهدئ الغضب و لا تعوض الضرر الحل الترقيعي الوحيد العادل هو صرف تعويضات لجميع الطلاب و اعادة الامتحانات كاملة بعد التأمين ضد التسريب لكن خزينة الدولة لا تستطيع دفع تعويضات عادلة يبقى لازم ننسف المنظومة الفاشلة و تتبنى من جديد و الآن و نحن لا نملك فلوس و لا ارادة سياسية و لا اجتماعية لبناء منظومة تعليمية جديدة الحل الترقيعي العادل غير ممكن و نسف المنظومة الفاشلة الآن غير ممكن و الحل التسكيني و دحرجة المشكلة لقدام غير متاح يعني ايه ؟ يعني قفلت و اصبحت طبقة موظفي الدولة و شركات قطاع الاعمال كبارهم و صغارهم و كذلك فئة الاستقرار في مواجهة عاجلة غير آجلة مع نفسه...

-افرض فكرت و تهت و تفكيري طلع غلط ؟!!! -اهم حاجة راحة البال "يخلط اغلب اهلنا بين راحة الضمير و راحة العقل" -فكر كتير و مخه شت -لا داعي لذكر هذا الكلام امام العوام لانه ممكن يعمل لهم بلبلة -هاجمتني الافكار و الوساوس فاستعذت بالله من الشيطان و قمت توضأت و صليت ركعتين و بقيت كويس *نركن عقولنا ايام و شهور و سنين و اول ما نستخدمها نتيجة وقوعنا في مصيبة او نتيجة ادراكنا "استفوجئنا  :)  " اننا بقالنا سنين واقعين في مصيبة و نحاول نشغل عقولنا المركونة من سنين نصاب بشد عضلي و نبقى شبه فريق دمنهور في الدوري الاسباني العقل زينة زي النيش