دليلك لاستثمار اللجان الالكترونية

دليلك لاستثمار اللجان الالكترونية 

لو كنت عاطل ممكن تلاقي شغل عن طريق اللجان الالكترونية
لو عندك فكرة تريد نشرها و مش قادر تقدر تستفيد من اللجان الالكترونية
 لو نفسك تبيع ضميرك بأعلى سعر و تشرب شاي بالياسمين لن تجد وسيلة اسهل من اللجان الالكترونية
 لو ثورجي و مناضل و نفسك تموت شهيد اسهل طريق لهدفك عن طريق اللجان الالكترونية

بص يا معلم اللجان الالكترونية مهمتها في الحياه تطبيق المثل الشعبي "خدوهم بالصوت ليغلبوكم" عن طريق الشير بغباء و التبرير بغباء و الهجوم بغباء كلابي منقطع النظير على اللي يتقالهم "بيسك عليه"
 لذلك لا تحاول ابدا ان تدخل معهم في حوار لانك بالضبط شبه اللي حاول ياخد عضمة من الكلب و بالتالي سيادتك معضوض معضوض معضوض يا ولدي
 و حتى لو انتصرت على الكلب فصاحب الكلاب ممكن يطلق عليك بدل الكلب عشرة
 و بالتالي انت مهمتك انك تصطاد صاحب الكلاب و اللي مربيها و اللي مشغلها لمصلحته
خليك مصحصح
 الهدف من اصطياد صاحب الكلب الالكتروني اما انك تهزمه بالعقل و المنطق و تنصر الحق
 يا اما عربية سودا او حتى لادا صفرا تطلع وراك على الرصيف و تموت شهيديا اما لو انت واد منحط و قليل الرباية و عايز تبيع ضميرك بسعر مناسب و تبقى كلب مهم و تاخد مرتب كويس و تحقق مصلحة او وظيفة كويسة في شركة من شركات مربي الكلاب برضه حتلاقي مصلحتك

كيف تصل الى الهدف "صاحب الكلاب" ؟
الخطة بمنتهى البساطة انك تحتفظ بتركيزك و ادبك اطول فترة ممكنة و تعمل الاتي
1-لا تضع ردود ابدا على فيضان الشير في (الهجوم او التبرير او التفاهة) الا اذا كنت صاحب الرد الاول
 ركز يا حج لا تضع رد على عضو اللجان الالكترونية الا اذا كنت صاحب الرد الاول لان باقي الردود تساهم في نشر البوست و لا يلتفت لها معظم الزوار و بالتالي تبقى حضرتك بقيت شغال عند عضو اللجنة و انت مفكر نفسك بتهاجمه

2-ردك الاول يجب ان يكون عاقل جدا مستند لحجة قوية جدا و لا تضع فيه اي دليل غير اكيد او شتيمة او قلة ادب لان عضو اللجنة حيسيب الرد كله و يشم نقطة الضعف و ينسف ردك من خلالها
 فلو عندك اربع ادلة تثبت وجهة نظرك فيهم واحد انت مش متاكد منه او معندكش اثبات ليه في حالة تشكيك الناس فيك يبقى متقولهوش و تنساه و تخليك في واحد بس من الادلة التانية

3-اعضاء اللجان الالكترونية حيحاولوا يوقعوك في الغلط باي شكل ليثبتوا للقراء تفاهتك فاوعى تستجيب لاستفزازهم و انسحب من الحوار بعد ان تشعر باحراز الهدف و لا ياخك الغرور لتتصور انك ممكن تدخل هدف اخر لانك ساعتها ممكن تضيع الاثنين

بعد انسحابك من الجدل العقيم بعد تحقيق اول هدف من اول رد ستتوالى عليك طلبات الصداقة من المعجبين بكلامك و من اعضاء اللجان و من الصيادين المهرة

4-اثبت و اتقل و لا تضيف لقائمة اصدقائك الا الناس اصحاب الردود العاقلة و المؤدبة و اوعى تضيف لاصدقائك مأفوراتي او مشيراتي لانهم حيكرهوك في الفيس بوك

5-انت الان بدات تصنع حولك دائرة و لو صغيرة اسعى لتكبيرها علشان اصدقاءك يستفيدوا من ارائك و انت كمان تستفيد من ارائهم
 و لا تنجر ابدا للدوائر التي سيصنعها حولك اعضاء اللجان الالكترونية مهما كان حجمها اكبر و اثبت في دائرتك التي صنعتها لنفسك او بمعاونة الاصدقاء العقلاء و طول ما انت عاطي ظهرك للدوامات الالكترونية عمر ما حد حيقدر يعضك

6- اذا رايت اعضاء اللجان الالكترونية يكتبون و ينشرون ما لا يرضيك لا تضع ردود عليهم و انما اكتب انت خواطر و بوستات على صفحتك و خليهم هما يردوا عليك على ارضك يا معلم

7-انت في صفحتك ملك الفيس بوك اللي يقل ادبه عليك و يشتمك اعمله حظر بدون تحذير (بلوك) اياك و حب الاستطلاع و انك تقول مش حاعمل بلوك علشان اعرف هو بيهلفط بيقول ايه
لا اوعى ترخص نفسك
 اعمل البلوك المتين و اطرد عضو اللجنة قليل الادب و هما حيبعتوا لك واحد تاني افضل و اشيك و بيلبس كرافتة قبل الرد و بعده
***********
 لو قدرت تنفذ الخطة دي صح اضمن انك حتقق كل احلامك ان شاء الله لو عاوز تموت شهيد ربنا حيسهلك لو عاوز تنشر افكارك و تجهر بكلمة الحق في وجه الطغيان و حتى لو عاوز تبيع ضميرك و تلاقي وظيفة في شركة من شركات فلان