لو الفلول تثقفوا سياسيا لتمنوا نجاح الثورة و تحقيقها لاهدافها

طيب تعالى نحسبها
نفسك في ايه يا عم الفلولي ؟ "عايزين نرجع زي الاول و احسن"
ترضى يا عم الفلولي ان يجي واحد لسه متعلم النفاق اول امبارح و حرامي اقل منك خبرة و دافع رشوة اقل منك و بلطجيته طريين يجي المجمع الانتخابي بتاع الحزب اللي كان ماسكه احمد عز ينزله قبل منك في قايمة الحزب و يدخل المجلس و انت لأ علشان شكله في الصورة عجب جمال بيه و انت صورتك لا مؤاخذة معجبتهوش؟
طيب عرفت تسترد رشوتك ؟ لأ

طيب ترضاها لنفسك يا عم انك تدفع الشئ الفلاني لكمال بيه علشان تبقى مرشح الحزب و فعلا تبقى انت مرشح الحزب و يجي فلولي تاني يدفع لظابط المباحث يقوم يزوره صناديق الدايرة كلها و انت المرشح الرسمي للحزب ميتزورش ليك و لا صندوق و فلوسك تضيع على الارض ؟
طيب ترضاها لنفسك انك تبقى انت اللي مجمع البلطجية و العيال اللبش و مشغلهم و عامل احلى تاييد للحكومة و في الاخر يجي واد هسهس فسفس كده بيرطن لغات و يقولك "فكر جديد"
طيب انت مالي ايدك من الجدع السيسي ده ؟ مش يمكن يبيعك و يقول تعالوا نطهر البلد من الحرامية القدام و ينزل بطقم حرامية جديد نوفي ؟
-ميقدرش اصلنا وقفنا معاه وقفة جامدة و نقدر نوقعه زي مقومناه و نصرناه على الاخوان و بتوع التحرير
-طيب ما هم الاخوان كانوا ضامنينه و باعهم و الثوار انتوا نزلتوا معاهم و بعتوهم
انت عايز تقول ايه ؟ قصدك يعني ان السيسي ده ممكن يبقى سيس و يتخلص مننا ؟ ازاي ؟ ده انا مشغل له البلطجية ورديات صبح و ليل يقطعوا عيال الاخوان ضرب لو عدوا من الناحية كلها
-ندل و يعملها
- لا يا راجل لو عملها ساعتها ننزل مع الاخوان و الثوار و نعتصم في الميدان لغاية ما يرحل
- هو انت خليت فيها اخوان و لا ثوار ما انت قطعتهم ضرب و سحل - و بعدين مين حيسمع كلامك ساعتها و انت كنت مالي الدنيا ليه مدح و شكر
- يعني ايه ؟ نطلع من المولد بلا حمص ؟ نضمن حقنا ازاي ؟
سيب الثورة تنجح
عايز العيال دي تحاكمنا على خدمتنا للبلد ؟
- يا عم الدفاتر دفاترك هو حد حيعرف يثبت عليك حاجة و بعدين هما فين و الحكم فين
- يعني فكرك كده ؟
-امال
لم الصبيان يا ابني و غرقوا الحيطة الثورة مستمرة و يسقط يسقط حكم العسكر