ازمتنا في كلمتنا و ليست في قلتنا

ربما لا تكون ازمتنا في اننا قلة قدر ازمتنا في اننا لا نخاطب الناس بما يناسب عقولهم
ان كان لك قريب صاحب عمل"ورشة او شركة او مصنع او مكتب" و فرحان بالسيسي اسأله عن رد فعله بعد فوز السيسي لما يتصل بيه سكرتير سيادة اللواء المحافظ و يطلب منه تبرع اجباري علشان مصر و ساعتها لا يقدر يقدم طعن امام الضرائب و لا يقدر يتأكد ان تبرعه يستخدم الاستخدام الامثل و لا يقدر يتظاهر

ان كان لك قريب في حزب النور تعالى على نفسك و اسأله افرض السيسي انقلب عليكم و دخلكم السجن تسلوا الاخوان هاتقدروا تعملوا ايه ساعتها و انتم معمول عليكم حفلتين واحدة برة السجن بالايقاع و التانية جوة السجن بما لا يخالف

لو انت مسيحي و اقاربك بيحبوا يسمعوا اراء الكنيسة السياسية اسألهم افرضوا اجهزة الدولة استخدمتنا كدروع بشرية في صراعها مع الاسلاميين و الخارج و عملوا فينا زي يوم ماسبيروا و كنيسة القديسين هانعمل ايه ساعتها و هل هانقدر على اعلام لميس ؟

لو لك قريب ضابط جيش اسأله هاتعملوا ايه لما تبقى نظرة المجتمع ليك تتغير زي ما اتغيرت تجاه الشرطة ثم النيابة في الفترة الاخيرة و كما تغيرت تجاه الشيوخ و الاخوان عندما دخلوا السياسة من الشباك الخلفي و ليس من ابوابها الطبيعية
و اسأله كمان عن حياته حيبقى شكلها ايه و هو كل يوم داخل في حروب بالوكالة في ليبيا و اليمن و السودان و سيناء في صراع مع اعداء حقيقيين او مصطنعين او وهميين

اما بقى قريبك الموظف و الفلاح و ساكن العشوائيات فهو غالبا لن يصدقك لكن من باب انك تبقى عملت اللي عليك عرفه ان السيسي مش هايديك لانه ممعاهوش يديك هو هايوزع على الجيش و الشرطة و المستثمرين الاجانب اللي هايستغنوا عنك و يجيبوا عمالة صينية و هندية و لو طلعت في مظاهرة سواء كانت مظاهرة مؤدبة او مظاهرة تقطع الطريق ساعتها سيعاملك كانك اخواني رافع شارة رابعة و مش مقدر الظروف الحساسة اللي امك مصر بتمر بيها و سكان الكوكب المصري الشقيق يشمتوا فيك لانك مش بتقطع الجاتوه اربع حتت و توفر منهم علشان مصر
"كلموهم عن نفسهم مش عن نفسكم"

تعليقات

التسميات

عرض المزيد