اوعى تدخل كلية حقوق

اوعى تدخل كلية حقوق

 1- مصر ليس فيها قانون "الكلام بجد مش بغرض التهويل" 

2- مصر لو بقى فيها قانون نتيجة ثورة ناجحة او معجزة ربانية فلن تحتاج الا لعشر عدد القانونيين الموجودين على الرف

 3- كلية حقوق انجليزي مشروع فاشل بل شديد الفشل الا لمن كانت لغته الام اللغة الانجليزية لان دراسة القانون هي دراسة فقهية عميقة واللغة واللفظ احد اهم ادواتها "فاكر الشيخ الشعرواي كان بيتعامل مع النص القرآني ازاي؟" اهي مهمة المحامي او رجل القانون عامة ان يتعامل مع نص القانون كتعامل الشعرواي مع نص القران تعرف تعمل كده بالانجليزي ؟ لو تقدر او ناوي تحاول تقدر توكل على الله

4- اوعى حد يخدعك ويدخلك بحجة ان ابن عم جوز خالته قاضي وممكن يتوسط لك ...... انسى 

5- "اهي شهادة تتجوز بيها " لا يا حبيبي خليك ثانوية عامة واتجوز واحدة معاها دبلوم احسن لك

6- "مش احسن من القعدة على القهوة" لاء القعدة على القهوة احسن وثبت عمليا ان القعدة على القهوة في سن مبكر افضل من القعدة في سن كبير

7- كلية الحقوق كثقافة من افضل الكليات اللي ممكن تتعلم منها كثير من مداخل العلوم الانسانية او الفلسفية بطريقة ممنهجة وعملية جدا وكذلك لو بتحب الدراسة الحقوقية والقانونية كدراسة فأنا ارشحها لك  بشرط ان تكون حاصل على مؤهل سابق تعمل به فعلا ومش محتاج من كلية الحقوق غير تزود ثقافتك

 في الحالة دي يبقى تتوكل على الله وتدخل حقوق تنهل من الثقافة والتفكير والتحليل وفي ناس كتير جدا استفادوا من دراسة الحقوق ثقافيا وعمليا من اللي دخلوها على كبر ومكانوش منتظرين منها عائد مادي مباشر