مع الوقت الاجيال القادمة ستعيد اختراع العجلة و هنبقى زي الفل

وفق معلوماتي غير المتخصصة و غير العميقة و اللي ممكن تكون غلط "عادي جدا" ان الاتجاهات الفكرية و الفلسفية و ما بني عليها من انحيازات سياسية و اقتصادية في الغرب ظهرت كاستجابة لتحديات ظهرت في بيئاتهم لذلك نجد ان تياراتهم الفكرية مهما كانت ضعيفة جماهيريا لكنها اصيلة "يعني انساق فلسفية مترابط و متماسكة" و ليست مثل التيارات الفكرية التي ظهرت في العالم العربي التي تم استيرادها زمانيا او مكانيا و يدوب تم التجميع و التقفيل على ارض الوطن لذلك فانها مع اول تحدي حقيقي تتحول الى قبائل حقيقية مش كده و كده

ربما ما نحن فيه من ضغوط و حوارات خشنة قد يعيد فرز الاولويات لدى قطاعات المهتمين بالشأن العام و تبدا خريطة الافكار و التيارات في التشكل

فها نحن نرى يمين مصري على وشك التبلور الكامل اصبحت له ملامح و انحيازات واضحة و مع الوقت سيكون لديهم منظرين بجد و سيظهر على الجانب الاخر تيار انساني حقيقي و مع الوقت ستظهر تنظيراتهم و تتبلور انحيازاتهم و اهتماماتهم و مشروعاتهم على الارض

اصل حركة المجتمعات مش بتتكتب على ضوء الشموع و لكن عجلة تاريخ المجتمعات وقودها الناس "اعصابهم و دماءهم و اعمارهم و عصارة نخاعهم" خاصة اننا ناويين نبدأ تجربتنا بنفسنا و مش غاويين نتعلم من تجارب غيرنا "باعتبارهم كفار مالناش دعوة بيهم" و لا حتى من تجاربنا "مش معنى انك اتلسعت من النار مرة انك تبقى شكاك و تعمم و كل ما تشوف نار تقول دي بتلسع استهدى بالله كده و خش في النار و اللي مكتوب له حاجة حايشوفها"

فلازم نعدي على مصيبة مصيبة علشان تطمئن قلوبنا و نتاكد ان الظلم وحش و الكبت وحش و الفقر وحش و التعصب وحش و الفهلوة لا تفيد و لو افادت