كفاية عبط بقى يا دولة هابلة و ثورة اهبل منها

زي ما السلطة عندها سياسة كيد نسا برضه الشباب اللي مفكر نفسه مستنير و ثوري عندهم كيد عيال و كم كبير من خداع النفس و الضلالات فاقدة الصلاحية و المخدرات المغشوشة
يعني الافكار المنتشرة عن ان مصر بلد غنية بس منهوبة "لا انكر النهب" و ان لو حنفية الفساد اتقفلت كل حاجة هتتصلح و التناول الشائع لطرق التعامل مع الارهاب و ان ازاي ضابط برتبة عميد بينزل من بيته من غير حراسة في المسافة من باب شقته لباب عربيته التي يقودها مجند و بالتالي الدولة مقصرة في حين ان لو كل عميد و لواء لو بقى لهم موكب سيكون نفس الشخص من اوائل المعترضين "و انا معاه" و واحد تاني شايف ان عناوين بيوت الضباط لازم تكون سرية على اساس انهم ليسوا بشر لهم جيران و اقارب و حياه اجتماعية و اولاد في مدارس
و ناس بتختزل الارهاب في مجرد كونه عنف متبادل و ان لو بلحة مشي و داعش داقت طعم الديمقراطية الدنيا هتبقى ربيع و الجو بديع
و كذلك الناس اللي بتتريق و تستعلي على مطالب و احتياج الشعب للاستقرار و الامان و لقمة العيش و كأن سيادته ملاك مجنح لا يأكل الطعام و لا يشم الكلة
و قطاعات من الشباب بيحلموا بعصر ما قبل المؤسسات و القبيلة و بيستدلوا باقوال و نظريات لم تتبلور بعد في مجتمعات تستعد لمرحلة ما بعد الدولة
و اخرون يتصورون ان السلطة تزول بمجرد ما نعمل مظاهرة كبيرة و ان الشعب العبيط مش راضي ينزل يعمل المظاهرة دي علشان عبيد و عبيط و يتصورون ان تفكيك الدولة لن يحل محله سيطرة العصابات و بلطجية الشوارع و كهنة الطوائف و لكن كل هؤلاء سيتوبون اثناء تلاوة النشيد الوطني و يتطهرون و يطالبون بزعيم المثقفين نبيا لهم
كفاية عبط بقى يا دولة هابلة و ثورة اهبل منها

تعليقات

التسميات

عرض المزيد