شحنة غضب

الانسان مننا بيطلع يلاقي نفسه بيحب بيئته و ينتقدها بعنف لانه عاوزها كاملة مكملة لكن بيئتك هي اللي بتعلمك ازاي تفقد حبك ليها تدريجيا و يبدا عنف انتقادك ليها يقل كل ما حبك ليها يقل و تبدا في نفاقها و مدح عيوبها كل ما كراهيتك ليها تزيد و ده مش بس نفاق لبيئتك لكن كمان نفاق و خداع لنفسك علشان ماتنفضحش بينك و بين نفسك و تكتشف انك كداب
اكتر ناس رافعين شارات حب مصر هما اللي مش عايزين يرجعوا و لا مخططين يرجعوا و لو حد رجع بيبقى ناوي يعيش في محمية تعزله عن اهلها و اللي له حق الانتخاب منهم في غربته بينتخب اكتر مرشح ناوي يمنع الهجرة من بلده اللي بيدعي حبها لبيئته اللي مش عايز حد يوسخها
اكتر ناس بيدعوا حبها كارهين اهلها كارهينهم كارهينهم شايفين ان وجودهم عار و تكاثرهم عار و انهم عبء على الوطن و انا مش قادر افهم ازاي تحب وطن من غير ناسه ازاي بتحب مصر و شايف ان شعبها يستحق الفناء بترقص على دمه و بتبرر اللي يغمه
الحب ممكن يكون وجهات نظر و كل واحد بيحب بطريقته لكن اللي ما يعرفش يتعاطف و لو بينه بين نفسه مع دم انسان متعذب و لا مع طفل محروم من رضعة و لا مريض مش لاقي دواه يبقى لا بيحب مصر و لا حتى بيحب نفسه
و انا كمان على فكرة قربت ابطل احبها و قريب هاعلن اني بحبها
طيب نسبنا بقى من موال الحب و الكره و نسيب الكلام ده لهاني بيه شاكر و نتكلم جد
نحب بعض نكره بعض احنا في زفت في مركب واحد يا هانعيش سوا يا هنموت سوا و قوارب النجاه لا تسع الجميع
فلازم بقى نتفاهم على مبادئ العيش المشترك في هذا المكان علشان شايلانا نفس الارض
#لخابيط #طاقة_سلبية #تنفيث #شحنة_جنان

تعليقات

التسميات

عرض المزيد