الغلابة لا يثورون يوم الجمعة

لو الغلابة الجعانين نزلوا الشارع فعلا مش هاينزلوا يوم الجمعة غالبا هاينزلوا يوم حد او اتنين او تلات او في دخلة عيد

لو الغلابة نزلوا الشارع فعلا مش هاينزلوا يتظاهروا امام اجهزة السلطة لكن سيقتحمون سلاسل الهايبر ماركت و محلات التوحيد و النور "معركة ذات السلاسل"

لو الغلابة نزلوا الشارع مش هايركبوا مواصلات يروحوا بيها قدام الكومباواندات لكن هيتوجهوا فورا لتجمعات الطبقة المتوسطة الدنيا المجاورة لهم و يسطوا على السلع الاستفزازية زي الادوية و الفراخ و الاسماك و اللحوم و التلاجات

لو الغلابة نزلوا الشارع فعلا الطبقة المتوسطة اللي سيادتك منها هي اللي هتطلب تدخل الجيش بل ستدين الجيش على تاخره و تردده في الضرب في المليان و سويداء القلب

#ثورة_الجياع لو قامت ستجبرك كاحد سكان الفيس انك يا اما تختار الانضمام للصعاليك بما لهم و عليهم و اما ان تنضم قلبا و قالبا لعبيد قصر الفرعون يا ابيض يا اسود ما فيهاش #ابوالفتوح و لا حتى #مرسي عجل الله خروجه الشريف

#ثورة_الغلابة لو حصلت هاتجيب حاجة من مقاس شفيق باعتباره نقطة المنتصف بين رجال اعمال جمال و عسكر الجيش ليكونوا صفا واحدا في فرم المزيد من الغلابة بعد انتهاء #الغلابة من طحن و مصمصة ما تبقى من عظم #الطبقة_المتوسطة