لا تبحث عن المستفيد مفيش مستفيد

طريقة البحث عن المستفيد من الجريمة ربما تصلح احيانا و ليس دائما لو اننا في مجتمع كل اطرافه من العقلاء التي تحسب مكاسب و خسائر كل خطوة و كل فعل و لا يوجد اطراف حمقاء او عمياء او مستهترة او ثبت عنها انها كثيرا ما خططت ضد مصالحها

و صار المعتاد بيننا ان تقع الجريمة و كل طرف يسعى لاثبات وجهة نظره المسبقة من خلالها

#عدو_الاسلاميين شايفها دليل على انهم ارهابيين و لازم يفضلوا في السجن

#العلماني شايفها دليل على اهمية نبذ الدين او ضرورة تجديد الخطاب الديني

#الاخواني شايفها دليل على الفشل الامني و لازم مرسي يرجع علشان يجيب براهيم و سيسي في الداخلية و الدفاع و يرجع الازدهار الامني

#الثوري و الاخواني برضه شايفها دليل واضح و يقيني لا يراه الا المؤمنين بالثورة على انها جريمة من فعل النظام علشان يغطي على فشله الاقتصادي و علشان يخوف الشعب

واحد يسألني طيب انت شايفها ايه ؟

اجابتي بكل وضوح و صراحة و بجاحة : انا مش عارف اي حاجة و لا فاهم اي حاجة و ده العادي على فكرة يعني طالما لم ينزل الي وحي من السماء و لا كنت شاهد على الواقعة و لست محققا انظر الملفات و لا قاضيا تجمعت لديه الدلائل ما انا الا مجرد مواطن غلبان لا يثق في البيانات و لا المعلومات و لا التحليلات الصادرة من اي جهة في اي قضية انا مواطن مش عارف شراباته بتروح فين بعد ما تدخل الغسالة فكيف لي ان اعرف و اجزم و احكم و اوزع العقوبات على احداث الكون