جددوه

تخيل لو انت شيوعي و يجيلك شوية ليبراليين يقنعوك انك تطور و تجدد الخطاب الشيوعي ليستوعب احتياجات العصر
و انا اجدد لبسي على مقاسك انت ليه؟
هل الفكر الديني الاسلامي في حاجة الى تجديد ؟
 اظن ان كل المسلمين مقتنعين انه بحاجة الى تجديد و لو بطريقة ان باقي المسلمين المفروض يكونوا شبهي "سلفيين شبهي - صوفيين شبهيي - شيعة شبهي - طيبين شبهي و هكذا"
لكن هل يظهر التجديد و ماسورة مسدس السلطة مغروسة في فص دماغك اليمين و حد سكين الارهاب على حلقك و كل واحد فيهم بيقولك جدد و يا ويلك لو التجديد ماعجبنيش ! و يا سواد ليلك و خراب بيتك لو تجديدك عجب الناس التانيين و مكانش فيه الحاجات اللي على مزاجي
و في نظرية اخرى في التجديد الديني اننا نجيب شيوخ بلاستك و نمنحهم بطاقة حشيش مجانية و مفتوحة لاي استهلاك يحتاجونه لأن التجديد محتاج مزاج و لا عايزين التجديد يهرول و يبهوق و يبقى شكل تجديدنا تعبان و يضحك علينا اعداء الدين
طيب لما نكون عندنا تصور نهائي للتدين المجدد "متسامح و خفيف الظل و مش بيزعل حد و حنين على الفقرا و طيب مع الاثرياء حلو للشعب و مهذب مع السلطة يعني حاجة كده زي الاكسجين بيخدم الكل و صديق للبيئة و ليس له اي اضرار جانبية" يبقى احنا كده مش مستنيين نسمع هو الدين بيقول ايه ده احنا اللي بنحدد له يقول ايه
واقعيا و على مر التاريخ السلطات و المجتمعات هي اللي حددت في اغلب الاحوال للدين يقول ايه و يتدخل في ايه و متى يسكت و متى يتكلم لكن كانت غالبا بتحصل بخفة يد حاوي او بسيف سلطة او الاتنين مع بعض
لكن المشكلة دلوقتي ان الكل بقوا حواه و مصورين بعض من زوايا متعددة و الجمهور سخن و متصل ببعضه يعني مش هانعرف نقول للرجال "روقوا نفسكم" و للنساء "خدي حقك يا حبيبتشي"
و لا نعرف نقول للسلطة اهمية قمع الفتنة في الاسلام و نقول للشعب يا بخت من بات مغلوب و يخش الجنة و سيب السلطة تعورك و تدخل هي النار و اوعى تنافس على السلطة احسن حرام و اوعى تقدم في وظيفة محجوزة لابن القاضي احسن فلوسها حرام
دلوقتي خطبة مارينا بتتسمع في المطرية و عين شمس
"اجدد ازاي و انتم واقفين لي كده"
طيب احنا ايه اللي زنقنا الزنقة دي و عايزين نجدده ليه ؟ ما نسيبه في حاله
و هل لو سيبناه في حاله هو هايسبنا في حالنا؟ "نلبس ايه و ناكل ايه و نحط فلوسنا فين و نحكم ازاي و نتحكم ازاي"
طيب اقول لكم على حاجة ما كل واحد يعمل اللي هو عاوزه في حياته الخاصة و المساحات المشتركة و المجالات العامة تتحكم بالتفاوض او الصراع بس نخلي الصراع واضح يعني افجرك علشان شكلك مش عاجبني انما تقوللي بافجرك علشان الدين بيقول كده فده بيزود الصراع و بيمنع فرص التفاهم و التفاوض