الزواج بين التخطيط والدروشة والمفاجأة - الزواج بين الحقيقة والسراب

هي نظرتنا كلنا كمجتمع وافراد للزواج محتاجة مراجعة من اول وجديد ولاننا كمجتمع متخلف "وصف وليس سب" الذكي فينا اللي بيتعلم من آلامه وجراحه الذاتية ولا يقرا ولا يبحث في تجارب الاخرين والاغلبية مننا بتمشي في نفس ذات الطابور وبتقع في نفس ذات الحفرة و كلهم متخيلين انها عين وصابتهم
لذلك فاننا لن نفعل مثل المجتمعات المتحضرة و نطرح مشاكلنا للحوار الفعال ونفكر في الحلول و البدائل
وفي نفس الوقت الزمن اتغير وافكار عادات اهالينا فقدت صلاحيتها واصبحت مضرة جدا وبالتالي نحن كمجتمع امام نارين اما نار العزوبية او نار الزواج وفق منظومات منتهية الصلاحية لغاية ما يظهر جيل يختار يدرس مشكلات غيره ويحاول يتعلم منها ويتناقش فيها نقاش علني مفتوح والناس كلها تعبر وتفتي وتقول ومن بين كل لافكار المعروضة ممكن البعض يجد ما يلائمه من الافكار ويجربها وينضجها بتجربته سواء كانت تجربته ناجحة او فاشلة
وتلك مجموعة اسئلة تمهيدية لمن يريد ان يفكر ولا ينتظر القطيع
- الى اي مدى انت مستعد\ة ان تتزوج\ي وفق افكارك وقناعاتك وظروفك وما مقدار عدم التفاتك لانتقادات الاخرين غير المهمة ؟
-ما هي واجبات الزوج والزوجة الممكنة والواقعية و الفعلية كما تتصورها وتنوي الالتزام بها "بعيدا عن الصح كذا لكن احنا بنعمل كذا"
- مستعد تعيش\ي في اي مستوى دخل تراه مناسبا
-هل مستعد\ة تلغي الفرح والنيش والستاير ونخلي تمنهم في رصيد الاسرة في حالة حصل انجاب واضطرت الزوجة لترك العمل لمدة سنة او سنتين وبعد السنة او السنتين مين المسئول الاول عن الاطفال في مقابل حجم مسئوليات الطرف الاخر وما الحل في حالة تفاقم المسئوليات فوق مستوى قدرة احد الطرفين او كلاهما "واقعيا ناس كتير جدا بتخلف وترمي عند اهاليها"
- مع او ضد تاجيل الانجاب عدة سنوات للتاكد من الاستقرار النفسي و المادي لاسرتك
- ناوي تعلم اطفالك حكومي و لا خاص وما امكانياتك لذلك المتوقعة وفق حسبة منطقية "بلاش و النبي حكاية يجي برزقه"
-هل مستعد\ة لوضع تصور لشكل للطلاق كاحتمال وارد جدا للزواج وهل تضع\ين في الحسبان ان الزيجة الاولى لا يشترط ان تكون الزيجة الناجحة وان الفشل وارد ولابد من تصميم وضع الطلاق من قبل البدء باعتباره سلم طوارئ ماينفعش نتعامل معاه بمنطق "تف من بقك والشر برة و بعيد" حتى لا تستمر الاسرة كل اطرافها معذبين لكنهم لا يملكون طريق الخلاص لاسباب اقتصادية واجتماعية ووجود اطفال مكانش معمول حسابهم في الزواج قبل الطلاق
-في حالة تاجيل الزواج "اختيارا او اضطرارا" كيف ستتعامل مع غريزتك الجنسية "سيبك من الشعارات وانك تقول انا ناوي والنية لله اني اعمل كذا لكن كل يوم باضطر اعمل كذا"
-هل انت مستعد تفكر في الكلام ده بجد وماتقولش الامور ما تتحسبش كده ومش كل حاجة بتمشي بالورقة و القلم وسيبها على الله وربنا بيرزق ولو كل الناس مشيت على كلامك ده يبقى مفيش حد هايتحرك من مكانه ؟